Baby Phaung

သားရဲ့ ကလေးဘဝလေးအတွက်
မာမီ့ရဲ့ အိမ်မက်တွေကို မေ့လျော့တဲ့အထိ
စွန့်လွှတ်ခဲ့တာက
မာမီ့ရဲ့ အိမ်မက်တွေထက်
သားရဲ့ ကလေးဘဝလေးကို
မာမီပိုတန်ဖိုးထားလို့ပါ🖤

သားဖောင်းလေးမေ‌မေ.....

ကလေးတွေက စကားနဲ့သင်ပေးတာထက် မိဘတွေရဲ့လုပ်ရပ်ကို ကြည့်ရင်း ပိုသင်ယူတတ်ကြတယ်တဲ့… 💜

အဲ့ဒါကြောင့် သူ့သားလေး ကြီးလာတဲ့အခါ
“အိမ်မှုကိစ္စဆိုတာ မိန်းမတစ်ယောက်တည်းရဲ့တာဝန်” လို့ မမြင်ဘဲ၊ ကိုယ်ချစ်တဲ့သူ ပင်ပန်းနေရင် တတ်နိုင်သလောက် ဝင်ကူပေးတတ်တဲ့ အမျိုးသားတစ်ယောက်ဖြစ်လာစေချင်လို့ သူကိုယ်တိုင် အမြဲရှေ့ဆောင်လမ်းပြ လုပ်ပြတတ်တယ်။

အားတဲ့အချိန်တိုင်း အိမ်မှုကိစ္စတွေမှာ ဝင်ကူတယ်…
မိန်းမပင်ပန်းနေတာမြင်ရင် လက်ပိုတစ်ဖက်ဖြစ်ပေးတယ်…
“ဒါက ယောကျ်ားလုပ်ရမယ့်အလုပ်၊ ဒါက မိန်းမလုပ်ရမယ့်အလုပ်” ဆိုပြီး မခွဲခြားဘူး။

အခုလည်း လက်မှာဒဏ်ရာရထားတာတောင်
မိန်းမက ကလေးထိန်းရတာ ပင်ပန်းနေမှာစိုးလို့
“မိန်းမ ကလေးပဲထိန်း… ကိုကိုချက်မယ်” ဆိုပြီး
ကိုယ်နာနေတာကို ခဏမေ့ထားပြီး မိသားစုအတွက် မီးဖိုချောင်ဝင်ပြီး ချက်ကျွေးနေလေရဲ့… 🥹💜

သားအတွက်တော့
သားပါးပါးက စကားလုံးတွေနဲ့ သင်ပေးနေတာမဟုတ်ဘူး… ချစ်ခြင်းမေတ္တာဆိုတာကို ဘယ်လိုဖော်ပြရမလဲ၊ ဘယ်လိုဂရုစိုက်ရမလဲ၊ မိသားစုဆိုတာ ဘယ်လိုအတူတူတာဝန်ယူရမလဲဆိုတာကို သူ့ရဲ့လုပ်ရပ်နဲ့ နေ့တိုင်း သားကိုသင်ပြပေးနေတာပါ💜

သားအတွက် မာမီဆောက်ပေးချင်တဲ့ "အိမ်"✨

တစ်နေ့ မာမီ့သားလေး အရွယ်ရောက်လာတဲ့အခါ
“ငါ့အိမ်ကို လွမ်းလိုက်တာ” လို့ ပြောစေချင်တယ်။ တကယ်က အိမ်ကိုမဟုတ်ဘဲ “ဒီအိမ်မှာ ခံစားခဲ့ရတဲ့အရာတွေကို” လွမ်းစေချင်တာ💜

မာမီတို့ဆောက်ပေးချင်တဲ့အိမ်က
နံရံတွေ ခိုင်ခံ့နေရုံနဲ့ မလုံလောက်ဘူး....
သားရဲ့ခံစားချက်တွေကို လုံခြုံစွာဖွင့်ထုတ်ပြလို့ရတဲ့အိမ်၊ အမှားလုပ်မိရင် အပြစ်တင်တာထက် အမှားကို အမှန်ပြန်ပြင်ဆင်ဖို့ သင်ကြားပေးတဲ့အိမ်၊ ဝမ်းနည်းတဲ့နေ့တွေမှာ မျက်ရည်ကျလို့ရတဲ့အိမ်၊ ဘဝမှာကျရှုံးနေတဲ့အခြေအနေမျိုးမှာတောင် လက်ခံပေးနိုင်တဲ့အိမ် ဖြစ်နေမှရမှာ....

မာမီတို့က သားရဲ့ဘေးနားမှာ
အမြဲတမ်းရှိနေပေးနိုင်မှာမဟုတ်ဘူး။
တစ်နေ့ သားက
မာမီတို့ရဲ့လက်ကို လွှတ်ပြီး
သားရဲ့ ကိုယ်ပိုင်ဘဝလမ်းကို လျှောက်သွားရမှာ...

အဲ့တာကြောင့် သားရဲ့ စိတ်နှလုံးသားထဲမှာ -

“ငါပြောသမျှကို နားထောင်ပေးခဲ့တဲ့နေရာ၊
ငါ့ခံစားချက်တွေကို လက်ခံပေးခဲ့တဲ့နေရာ၊
ငါပင်ပန်းရင် အချိန်မရွေး ပြန်လာလို့ရတဲ့နေရာ
တစ်နေရာတော့ ရှိတယ်…”

လို့ အမှတ်ရနေမယ့် "အိမ်" လေးတစ်ခု
မာမီဆောက်ပေးချင်တာ💜

သားအတွက် မာမီတို့ပေးချင်တဲ့ အကြီးမားဆုံး လက်ဆောင်က ပြီးပြည့်စုံတဲ့ဘဝဖြစ်နေဖို့ဆိုတာထက်
ဘဝမှာဘယ်လောက်ပဲ ခက်ခဲလာပါစေ “ငါ့မှာ ပြန်လာစရာနေရာ၊ ငါ့ကိုလက်ခံပေးမယ့်နေရာရှိတယ်” လို့ ခံစားနိုင်တဲ့အထိ စိတ်လုံခြုံမှုလေးတစ်ခုကိုပဲ လက်ဆောင်ပေးခဲ့ချင်တာပါ💜

Our little family of three.
Building a home that our child can always come back to. 🏡💜

ကလေးတစ်ယောက်ကို မိဘတွေ ပေးနိုင်တဲ့ အဖိုးတန်ဆုံးအရာက "ငွေ" မဟုတ်ပါဘူး “စိတ်လုံခြုံမှု” ပါ💜

ကလေးကို ကျောင်းကောင်းကောင်းပို့ပေးတယ်။
အစားအသောက်ကောင်းကောင်း ကျွေးတယ်။
လိုချင်တဲ့ ကစားစရာတွေ ဝယ်ပေးတယ်။
အဝတ်အစားကောင်းကောင်းလှလှတွေ ဝတ်ပေးတယ်။
အနာဂတ်အတွက် ငွေစုထားပေးတယ်။
ဒါတွေအားလုံးက တကယ်ကို အရေးပါ ပါတယ်။

ဒါပေမယ့်…

“ငါဝမ်းနည်းရင် မေမေ့ကို ပြောပြလို့ရတယ်”
“ငါမှားသွားရင် ဖေဖေ့ကို ပြောပြလို့ရတယ်”
“ငါအောင်မြင်တာပဲဖြစ်ဖြစ်၊ မအောင်မြင်တာပဲဖြစ်ဖြစ် ငါ့တန်ဖိုးက မပြောင်းဘူး” လို့
ကလေးက ခံစားရတဲ့ အိမ်တစ်အိမ်ရှိတာကတော့ သူ့တစ်သက်တာအတွက် အရမ်းတန်ဖိုးရှိတဲ့ လက်ဆောင်တစ်ခုပါ။ ဒါကပဲ Emotional Maturity (စိတ်ခံစားမှုဆိုင်ရာ ရင့်ကျက်မှု) တည်ဆောက်ဖို့ အခြေခံအုတ်မြစ်တစ်ခု ဖြစ်လာပါတယ်ရှင်

🌸 Emotional Maturity (စိတ်ခံစားမှုဆိုင်ရာ ရင့်ကျက်မှု) ဆိုတာ ဘာလဲ?

စိတ်ဆိုးတဲ့အခါ ကိုယ့်စိတ်ကို သိနိုင်တာ၊ ဝမ်းနည်းတဲ့အခါ ခံစားချက်ကို နားလည်နိုင်တာ၊ စိတ်ပျက်တဲ့အခါ ချက်ချင်းပေါက်ကွဲမသွားဘဲ ထိန်းချုပ်နိုင်တာ၊ တစ်ဖက်လူရဲ့ ခံစားချက်ကိုလည်း နားလည်ပေးနိုင်တာမျိုးပါ။

ဒါဟာ…

❌ အသက်ကြီးလာတာနဲ့ အလိုအလျောက်ရလာတာ မဟုတ်ပါဘူး။
❌ IQ မြင့်မှ ရလာတာလဲ မဟုတ်ပါဘူး။
❌ မွေးရာပါ အရည်အချင်းတစ်ခုလဲ မဟုတ်ပါဘူး။

နေ့စဉ်ဘဝမှာ မိဘတွေက ကလေးကို ဘယ်လိုတုံ့ပြန်ပေးလဲဆိုတာကနေ ကလေးက စိတ်ခံစားမှုဆိုင်ရာရင့်ကျက်မှုကို သင်ယူနေတာပါ။

၁။ “ခံစားချက်” ကို အသိအမှတ်ပြုပေးပါ 💜

ကလေးငိုတဲ့အခါ—

❌ “ဘာမှမဟုတ်တာလေးကို ငိုမနေနဲ့” လို့ပြောမယ့်အစား…

“ဟုတ်တယ်နော်… သားကအခု အရမ်းဝမ်းနည်းနေတာ”
လို့ ပြောပေးနိုင်ပါတယ်။

Validation ဆိုတာ ကလေးလုပ်သမျှကို လက်ခံပေးတာ မဟုတ်ပါဘူး။ ကလေးရဲ့ ခံစားချက်ကို နားလည်အသိအမှတ်ပြုပေးတာပါ။

“စိတ်ဆိုးလို့ရတယ်”
“ဝမ်းနည်းလို့ရတယ်”
“ကြောက်လို့ရတယ်”

ဆိုတာတွေကို ကလေးသိလာတဲ့အခါ သူ့ခံစားချက်တွေကို ဖုံးကွယ်ဖို့ထက် နားလည်ပြီး ကိုင်တွယ်တတ်ဖို့ သင်ယူလာနိုင်ပါတယ်။

၂။ “ဒီအိမ်မှာ ပြောလို့ရတယ်” ဆိုတဲ့ စိတ်လုံခြုံမှု ပေးပါ 🏠

ကလေးက အမှားလုပ်မိတဲ့အခါ—

“ဘာလို့ ဒီလိုလုပ်တာလဲ!”
“ဘယ်နှခါပြောရမှာလဲ!”
“နောက်တစ်ခါ ထပ်ဖြစ်တာမမြင်ချင်ဘူးနော်!”

ဆိုပြီး ကြောက်အောင်လုပ်လိုက်ရင် ကလေးက အမှားထပ်မလုပ်တော့တာမဟုတ်ပါဘူး။ အမှားလုပ်မိတဲ့အခါ မိဘကို ဖုံးကွယ်တတ်လာတာပါ။

အဲ့တာကြောင့်

“သားလုပ်လိုက်တာက မမှန်ဘူး။ ဒါပေမယ့် ဖြစ်သွားတာကို မေမေ့ကို ပြောပြလို့ရတယ်။ မေမေတို့ အတူတူ ဘယ်လိုပြန်ပြင်မလဲဆိုတာကို စဉ်းစားလို့ရတာပေါ့”

ဆိုတဲ့ တုံ့ပြန်မှုမျိုးက အမှားကို ဖုံးကွယ်ဖို့မဟုတ်ဘဲ အမှားကနေ သင်ယူနိုင်ဖို့ကို ကူညီပေးပါတယ်။

၃။ “ခံစားချက်” နဲ့ “အပြုအမူ” ကို ခွဲခြားသင်ပေးပါ 🌱

ဒါက အရမ်းအရေးကြီးပါတယ်။

“စိတ်ဆိုးတာက မမှားဘူး။ ဒါပေမယ့် စိတ်ဆိုး‌‌တာနဲ့ပဲ လူကိုရိုက်လို့တော့မရဘူး။”

“မကြိုက်တာကို ငြင်းလို့ရတယ်။ ဒါပေမယ့် ပစ္စည်းတွေကိုပစ်ပေါက်လို့တော့ မရဘူး။”

ကလေးကို —

ခံစားချက်အားလုံးကို ခွင့်ပြုပေးလို့ရပါတယ်။ ဒါပေမယ့် အပြုအမူတွေကိုတော့ စည်းကမ်းနဲ့သင်းပေးရပါမယ်။

ဒီလိုနဲ့ တဖြည်းဖြည်း ကလေးက “ငါစိတ်ဆိုးတယ်” ဆိုတာနဲ့ “ငါစိတ်ဆိုးရင် ငါလုပ်ချင်သလိုလုပ်လို့ရတယ်” ဆိုတာက မတူကြောင်းကို နားလည်လာမှာပါ။

---

⚠️ ကလေးရဲ့ Emotional Maturity ကို ပျိုးထောင်ချင်တဲ့ မိဘတိုင်း မမေ့သင့်တဲ့ အချက်တစ်ခုရှိပါတယ်

အဲ့ဒါက ကလေးကို မပြောင်းလဲခင် ကိုယ့်ကိုယ်ကိုလည်း ပြန်ကြည့်ဖို့ပါ။ ကဲ အောက်က မေးခွန်းတွေကို ရိုးရိုးသားသား ဖြေကြည့်ပါနော် —

❓ ကလေးအော်တော့ ကိုယ့်အသံက ကလေးထက် ပိုကျယ်အောင် ပြန်အော်မိလား?
❓ ကလေးငိုတဲ့အချိန် "ငိုမနေနဲ့ အခုတိတ်" ဆိုပြီး ချက်ချင်း တိတ်ခိုင်းမိလား?
❓ ကလေးကအမှားလုပ်မိတဲ့အခါ အမှားကိုပဲ ပြင်ပေးတာလား၊ ဒါမှမဟုတ် ကလေးရဲ့တန်ဖိုးကိုပါ ထိခိုက်အောင် ပြောမိလား?
❓ "ငါ့ကလေးက ငါ့အတွက် ဒီလိုဖြစ်ပေးရမယ်" ဆိုတဲ့ မျှော်လင့်ချက်တွေကို ကလေးအပေါ် တင်ထားမိလား?
❓ ကိုယ်တစ်ခါမှ မရခဲ့တဲ့ ချစ်ခြင်း၊ အာရုံစိုက်မှု၊ အသိအမှတ်ပြုမှုတွေကို ကလေးဆီကနေ ပြန်ရချင်နေမိလား?

အဖြေတွေထဲမှာ "ဟုတ်တယ်နော်" ဆိုတာတွေ ပါနေရင် စိတ်မကောင်းမဖြစ်ပါနဲ့။ ဒါတွေက မိဘတိုင်းရဲ့ လမ်းခရီးမှာ ကြုံဖူးတဲ့အရာတွေပါ။ အရေးကြီးတာက — အဲဒီအချက်တွေကို စပြီးသတိထားမိဖို့ပါပဲ။ အမှန်တော့ မိဘဖြစ်တာဟာ ကလေးကို ပြောင်းလဲပေးရတဲ့အလုပ်တစ်ခုတည်း မဟုတ်ပါဘူး။ တစ်ခါတလေ… ကလေးကို ပျိုးထောင်ရင်း ကိုယ့်ကိုယ်ကိုပါ ပြန်ပျိုးထောင်ရတဲ့ ခရီးတစ်ခု ဖြစ်လာတတ်ပါတယ်။ ကလေးတစ်ယောက်ရဲ့ တစ်သက်တာအတွက် အခိုင်မာဆုံး အုတ်မြစ်က —

အိမ်ကြီးကြီး မဟုတ်ဘူး ၊
ဈေးအကြီးဆုံးကျောင်း မဟုတ်ဘူး ၊
ကစားစရာတွေ အများကြီး မဟုတ်ပါဘူး။

"ငါဟာ ငါဖြစ်နေတဲ့အတိုင်း အချစ်ခံရတယ်။
ငါ့ခံစားချက်တွေကို ပြောပြလို့ရတယ်။
ငါမှားသွားရင်လည်း ပြန်ပြင်ဖို့ အခွင့်အရေးရှိတယ်။"
ဆိုတဲ့ စိတ်လုံခြုံမှုပါ။ 🌸

ကလေးတွေက ပြောတာတွေကို နားထောင်တာထက်
ကိုယ်တိုင်မြင်တဲ့အရာကို ပိုပြီးအတုယူတတ်ကြတယ်။ ဒါကြောင့် ဒီနေ့ကစပြီး ကလေးကို ပြောင်းလဲဖို့ မကြိုးစားခင် ကိုယ်တိုင် ဘယ်လိုတုံ့ပြန်နေသလဲဆိုတာကို
တစ်စက္ကန့်လောက် ပြန်ကြည့်ကြည့်ပါနော်။ ငြိမ်သက်မှုနဲ့ ချစ်ခြင်းမေတ္တာကို ကိုယ်တိုင်ပြမှ ကလေးတွေကလဲ သင်ယူနိုင်မှာပါ။ 💜

💬 မေမေတို့/ဖေဖေတို့ရေ — ကလေးစိတ်ဆိုးနေတဲ့အချိန် ကိုယ့်ပါးစပ်ကနေ အရင်ဆုံးထွက်လာတတ်တဲ့ စကားတစ်ခွန်းက ဘာလဲ? ဆိုတာကို Comment မှာ ပြောပြလို့ရရင် ပြောပြခဲ့ပါအုံးနော် 💜

သားဖောင်းလေးမေမေ.....

#မိဘပညာ #ကလေးစိတ်ခံစားမှု #စိတ်လုံခြုံမှု #မိဘမေတ္တာ

"ငါ့သား/ ငါ့သမီးကို အိမ်ထောင်မပြုစေချင်ဘူး။ ငါ့နားမှာပဲတစ်သက်လုံးထားချင်တယ်" ဆိုတဲ့ မေမေတွေရှိကြလား?

ကျွန်မတို့ မိဘတွေက ကိုယ်မွေးထားတဲ့ သား/သမီးကို အရမ်းချစ်ကြတာဟာ သဘာဝပါ။ ဒါပေမယ့် "တစ်သက်လုံး ငါ့အနားမှာပဲထားမယ်၊ အိမ်ထောင်မပြုစေချင်ဘူး" ဆိုတဲ့အထိ ဖြစ်လာရင်တော့ ဒါဟာ ကျန်းမာတဲ့ မိဘမေတ္တာမဟုတ်တော့ပဲ မိဘရဲ့ ပိုင်ဆိုင်လိုစိတ် (အတ္တ)‌ လေးတွေပါ ရောပါနေကြပါပြီ။ မိဘက သားသမီးကိုချစ်တာဟာ မှားတာမဟုတ်ပါဘူး။ ချစ်ခြင်းမေတ္တာမှာ "ငါ့နားမှာပဲနေရမယ်" ဆိုတဲ့ ပိုင်ဆိုင်လိုစိတ်ဖြစ်လာတဲ့အချိန်မှသာ ပြဿနာဖြစ်လာတာပါ။

မြန်မာနိုင်ငံက တချို့မိဘတော်တော်များများမှာ ငါ့သား/သမီး ငါ့အနားကနေထွက်သွားရင် ငါတစ်ယောက်ထဲဖြစ်သွားမှာစို့လို့၊ ငါ့ကိုပြုစုမယ့်သူမရှိတော့မှာစိုးလို့၊ ငါ့ကိုရှာမကျွေးတော့မှာစိုးလို့ စတဲ့အကြောင်းပြချက်တွေကြောင့် သားသမီးကို အိမ်ထောင်မပြုစေချင်ကြတာ၊ အဝေးကိုမလွှတ်ချင်ကြတာမျိုးတွေရှိကြပါတယ်။ ဒီခံစားချက်တွေက မိဘတစ်ယောက်အနေနဲ့ သဘာဝကျသော်ငြားလဲ အဲ့ဒီခံစားချက်ကြောင့်နဲ့ -

"မေမေ့ကိုထားပြီး ဘယ်မှမသွားရဘူး"
"အိမ်ထောင်မပြုနဲ့"
"ငါ့သား၊သမီးရဲ့ ဘဝမှာ မေမေက အရေးအကြီးဆုံးပဲဖြစ်ရမယ်"

ဆိုပြီး ကလေးရဲ့ အနာဂတ်ရွေးချယ်မှုတွေကို လိုက်ထိန်းချုပ်နေမယ်ဆိုရင်တော့ မိဘမေတ္တာဟာ ကလေးအတွက် ဝန်ထုပ် ဝန်ပိုးတစ်ခုလိုဖြစ်လာမှာပါ။

မိဘတွေ အတ္တအရမ်းကြီးလွန်းသွားရင် ဘာတွေဖြစ်လာနိုင်မလဲ?

(၁) သား၊သမီးက ကိုယ့်ဘဝကိုယ် မရွေးချယ်ရဲတော့တာ

"မေမေနဲ့ဖေဖေ စိတ်ပျက်သွားမလား" ဆိုတဲ့ကြောက်စိတ်ကြောင့် ကိုယ်လိုချင်တာထက် မိဘစိတ်ကျေနပ်အောင်ပဲ ရွေးချယ်လာကြပါတယ်။ မိဘတွေအနေနဲ့တော့ ကလေးက လိမ္မာတယ်၊သိတတ်တယ်လို့မြင်နိုင်ပေမယ့် ကလေးကတော့ တစ်နေ့တခြား ကိုယ့်ဘဝကိုယ်မပိုင်သလို ခံစားနေရတဲ့လူတစ်ယောက်ဖြစ်လာမှာပါ။

(၂) မိဘမေတ္တာကို အကြွေးလိုခံစားလာရတာ

"သား/သမီး အတွက် မေမေက ဒီလောက်တောင်ပေးဆပ်ထားရတာကို သား/သမီးက ဒါလေးတောင်ပြန်မလုပ်ပေးနိုင်ဘူးလား" ဆိုတဲ့စကားတွေကို ကြားရပါများလာရင် "မိဘကို ချစ်ရင် မိဘလိုချင်တာလုပ်ပေးရမယ်" ဆိုတဲ့အတွေးဖြစ်လာပါတယ်။ အဲ့ဒိအခါ မိဘရဲ့ချစ်ခြင်းကို လွတ်လပ်စွာခံစားရတဲ့ မေတ္တာမဟုတ်တော့ဘဲ ပြန်ဆပ်ရမယ့် အကြွေးတစ်ခုလိုခံစားလာရပါလိမ့်မယ်။

(၃) မိဘနဲ့ နီးနေရတာကိုတောင် မွန်းကြပ်လာတာ

ထူးဆန်းပေမယ့် မိဘက ပိုဆုပ်ကိုင်လေလေ၊ သားသမီးက ပိုဝေးချင်လေလေဖြစ်တတ်ပါတယ်။ ဒါဟာ မိဘကိုမချစ်လို့မဟုတ်ပါဘူး။ ကိုယ့်ဘဝကိုယ် ရွေးချယ်ခွင့်၊ ကိုယ့်ဆုံးဖြတ်ချက်ကိုယ်ချနိုင်ခွင့်၊ ကိုယ်ပိုင်နေရာလေးတစ်ခုလိုအပ်လာတာကြောင့်ပါ။

(၄) အိမ်ထောင်ရေးနဲ့ မိသားစုဘဝကိုပါ ထိခိုက်နိုင်လာတာ

သားသမီး အရွယ်ရောက်လာတဲ့အခါ ကိုယ်ပိုင်အိမ်ထောင်ရေး၊ ကိုယ်ပိုင်မိသားစုတစ်ခု တည်ဆောက်ရမယ့် အချိန်ကိုရောက်လာပါတယ်။ အဲ့အချိန်မှာ မိဘက "မေမေ့ထက်တောင် အိမ်ထောင်ဖက်ကို ဦးစားပေးနေတယ်"၊ "အိမ်ထောင်ပြုပြီးမှ မိဘကို မေ့သွားတယ်" လို့ ခံစားနေမယ်ဆိုရင် သားသမီးနဲ့ မိဘကြားမှာသာမက သားသမီးနဲ့ သူတို့ရဲ့ အိမ်ထောင်ဖက်ကြားမှာပါ ပဋိပက္ခတွေဖြစ်လာပါလိမ့်မယ်။

(၅) သားသမီးက မိဘကို မုန်းနေတာမျိုးမဟုတ်ဘဲ အဝေးကနေပဲ ချစ်ချင်လာတာ

ဒါက အရမ်းနာကျင်စရာကောင်းပါတယ်။ တချို့ သားသမီးတွေက မိဘကို မချစ်ကြလို့မဟုတ်ဘဲ မိဘနဲ့ နီးနေရင် မွန်းကြပ်တာ၊ မလွတ်လပ်တာ၊ ကိုယ့်ဘဝကိုယ် မပိုင်တော့သလို ခံစားလာရတာတွေကြောင့် အနီးမှာမနေနိုင်ပဲ အကွာအဝေးတစ်ခုထားချင်လာကြပါတယ်။

(၆) ဒါက ငါ့ဘဝပဲ ဆိုပြီး ဆန့်ကျင်လာတာ

အမြဲတမ်းထိန်းချုပ်ခံနေရတဲ့ ကလေးတစ်ယောက်က အချိန်တစ်ခုရောက်လာတဲ့အခါ "ဒါက မေမေ့ဘဝမဟုတ်ဘူး။ ငါ့ဘဝပဲ" ဆိုပြီး ကိုယ့်ကိုကိုယ် ပြန်ရှာဖွေဖို့ မိဘရဲ့ ဆန္ဒတွေကို ဆန့်ကျင်တဲ့ပုံစံနဲ့ လွတ်မြောက်ဖို့ ကြိုးစားလာကြပါတယ်။

🔸ဒါကြောင့် မိဘမေတ္တာမှာ အရေးကြီးဆုံးက သားသမီးကို ကိုယ့်နားမှာထားနိုင်ဖို့ မဟုတ်ဘဲ တစ်နေ့ ကိုယ့်နားကနေ ထွက်သွားနိုင်တဲ့အထိ လွတ်လပ်တဲ့လူတစ်ယောက်ဖြစ်လာအောင် ပံ့ပိုးပေးဖို့ပါ။

မိဘက “ငါ့သား/သမီးက ငါ့ကို ဘယ်တော့မှမထားခဲ့ရဘူး” လို့တွေးနေတာထက် “တစ်နေ့ ငါ့ကိုမလိုအပ်တော့တဲ့အချိန်ရောက်ရင်တောင် ငါ့သား/သမီးက ပျော်ရွှင်ပြီး ကိုယ့်ဘဝကိုယ် တည်ဆောက်နိုင်နေရင် ကျေနပ်ပါတယ်” လို့တွေးနိုင်တာကမှ အတ္တမပါဘဲ ကျန်းမာတဲ့ မိဘမေတ္တာပါရှင်💜

သားဖောင်းလေးမေမေ💜

#မိဘမေတ္တာ #မိဘအတ္တ #သားသမီးကိုချစ်ခြင်း #မိဘနဲ့သားသမီး #သားသမီးလွတ်လပ်ခွင့် #မိဘတိုင်းဖတ်သင့်တဲ့စာ #သားဖောင်းလေးမေမေ

🚨 “တော်လိုက်တာ!” လို့ပဲ ချီးကျူးနေတာက တကယ်တော့ ကလေးအတွက် မကောင်းဘူးဆိုတာကို မေမေတို့ သိကြလား😳💜

ကလေးက ပုံတစ်ပုံဆွဲပြီး မေမေ့ဆီပြေးလာတယ်…

“မေမေ… သားဆွဲထားတာကြည့်ပါဦး!”

မေမေကလည်း ချစ်လို့—

“ဟယ်… တော်လိုက်တာ သားရေ! အရမ်းလှတယ်!” 🥰

လို့ ပြောလိုက်တယ်။ ဒီလိုပြောတာက မမှားပါဘူး။ မိဘတိုင်းက ကိုယ့်ကလေးကို ချစ်လို့ ချီးကျူးကြတာပါ။ ဒါပေမယ့် ကလေးကို ချီးကျူးတဲ့ “စကားလုံး” လေးတွေက သူ့ရဲ့ ကိုယ့်ကိုယ်ကိုမြင်တဲ့ပုံစံကို တဖြည်းဖြည်းတည်ဆောက်ပေးနေတယ်ဆိုတာကိုတော့ သိထားဖို့လိုအပ်ပါတယ်။

---

❌ “သားက တော်လိုက်တာ!”

ဒီလိုစကားကို အမြဲကြားနေရတဲ့ကလေးဟာ တစ်နေ့—

စာမေးပွဲအမှတ်မကောင်းတဲ့အခါ
Puzzle မဆက်နိုင်တဲ့အခါ
ပုံဆွဲတာမလှတဲ့အခါ
တစ်ခုခုကို မလုပ်နိုင်တဲ့အခါမျိုးတွေမှာ

“ငါ မတော်တော့ဘူးထင်တယ်…”

ဆိုပြီး ခံစားလာနိုင်ပါတယ်။ ဘာလို့လဲဆိုတော့…

သူ့စိတ်ထဲမှာ “ငါက တော်တဲ့ကလေး” ဆိုတဲ့ပုံရိပ်ကို တည်ဆောက်ထားမိတာကြောင့်ပါ။

ဒါကြောင့် တစ်ခါတလေ မအောင်မြင်မှာစိုးလို့ မစမ်းချင်တော့တာ၊ အမှားလုပ်မိမှာကို ကြောက်လာတာ၊ ခက်ခဲလာရင် လွယ်လွယ်နဲ့ အလျှော့ပေးတတ်လာတာမျိုးတွေ ဖြစ်လာနိုင်ပါတယ်။

---

🌱 ဒါဆို မိဘက ဘယ်လိုမျိုးချီးကျူးရမလဲ?

“ကလေးက ဘယ်လိုကလေးလဲ” ဆိုတာကို မချီးကျူးဘဲ
“ကလေးက ဘာလုပ်ခဲ့လဲ” ဆိုတာကို ချီးကျူးကြည့်ပါ။

ဥပမာ—

❌ “သားက ဉာဏ်ကောင်းလိုက်တာ!”

✅ “သားက ဒီတစ်မျိုးနဲ့မရတော့ နောက်တစ်မျိုးပြောင်းပြီး ထပ်စမ်းကြည့်ထားတာပဲ။”

---

❌ “သမီးက ပုံဆွဲတာ အရမ်းတော်တယ်!”

✅ “ဒီပုံကို အချိန်ယူပြီး သေချာလေးဆွဲထားတာပဲ။”

---

❌ “သားက အမြဲအကောင်းဆုံးပဲ!”

✅ “ဒီနေ့မှာ မနေ့ကထက် ပိုကောင်းအောင် ကြိုးစားထားတယ်ဆိုတာ မေမေသတိထားမိတယ်။”

---

❌ “အမှတ်တွေကကောင်းလိုက်တာ။ မေမေ့သားလေးကအရမ်းတော်တာပဲ!”

✅ “မေမေ့သားလေးက နားမလည်တဲ့စာတွေကို ထပ်ခါ ထပ်ခါလေ့လာရင်း နားလည်အောင် ကြိုးစားခဲ့လို့ အမှတ်ကောင်းနေတာ‌ မေမေသိတာပေါ့။”

---

❤️ တစ်ခါတလေ “တော်တယ်” လို့ မပြောဘဲ ဒီလိုမေးကြည့်ပါ…

“သားက ဒါကိုဘယ်လိုလုပ်လိုက်တာလဲ?”

“ဒီအဖြေကိုရအောင် သမီးဘယ်လိုစဉ်းစားလိုက်တာလဲ?”

“ဘယ်အပိုင်းက သားတွက်အခက်ဆုံးလဲ?”

“နောက်တစ်ခါဆို သမီးက ဘယ်လိုပြောင်းလုပ်ကြည့်ချင်လဲ?”

ဒီလိုမေးလိုက်တဲ့အခါ ကလေးက ကိုယ့်လုပ်ဆောင်ချက်ကို ကိုယ်ပြန်စဉ်းစားတတ်လာပါတယ်။ 🧠

---

အရေးကြီးဆုံးက…

ကလေးကို အောင်မြင်တဲ့အချိန်မှာပဲ ချီးကျူးတာမဟုတ်ဘဲ၊ ကြိုးစားနေတဲ့အချိန်မှာပါ အသိအမှတ်ပြုပေးဖို့ပါ။

“သားက ဒီ puzzle ကို မဆက်တတ်ပေမယ့် ကြိုးစားပြီးဆက်နေတာပဲ။”

ဒီစကားလေးက ကလေးကို ငါမရသေးတာက ငါမတော်တာ မဟုတ်ဘဲ ငါမရသေးတာက ငါထပ်ကြိုးစားလို့ရသေးတယ် ဆိုတဲ့စိတ်ထားမျိုး ရရှိစေနိုင်ပါတယ်ရှင်💜

---

မေမေတို့အတွက် မှတ်ထားစရာ💜

“ကလေးကို ဘယ်လောက်တော်တယ်ဆိုတာထက်၊ သူဘယ်လောက်ကြိုးစားခဲ့တယ်ဆိုတာကို မြင်အောင်ကြည့်ပေးပါ။”

ကလေးဟာ မေမေတို့ရဲ့ ချီးကျူးမှုကိုပဲ လိုအပ်နေတာမဟုတ်ပါဘူး။ "မေမေက ငါ့ရဲ့ကြိုးစားမှုကို အသိအမှတ်ပြုတယ်။ ငါမအောင်မြင်တဲ့အချိန်မှာလည်း ငါ့ဘက်မှာရှိနေပေးတယ်။” ဆိုတဲ့ခံစားချက်ကို ပိုပြီးလိုအပ်ပါတယ်ရှင်🤍

ဒီနေ့ကစပြီး
“တော်လိုက်တာ!” လို့ပဲပြောမယ့်အစား
“မင်းဘယ်လိုကြိုးစားခဲ့လဲဆိုတာ မေမေသိတယ်နော်…” ဆိုတဲ့စကားလေးတစ်ခွန်းကို ထပ်ဖြည့်ပြောပေးကြရအောင်‌ 🌱

ကလေးကို အမြဲတမ်း အကောင်းဆုံးဖြစ်အောင်သင်ပေးတာထက် အကောင်းဆုံးမဖြစ်တဲ့နေ့တွေမှာတောင် "ငါဟာ တန်ဖိုးရှိနေဆဲပဲ" လို့ ခံစားတတ်အောင်သင်ပေးတာက ကလေးတစ်ယောက်ရဲ့ confidence ကိုတည်ဆောက်ပေးဖို့အတွက် အလိုအပ်ဆုံးအချက်ပါရှင်💜

သားဖောင်းလေးမေမေ.....

#သားဖောင်းလေးမေမေ #ကလေးပြုစုပျိုးထောင်ခြင်း #ကလေးစိတ်ပညာ #မိဘများအတွက်

သင်္ဘောပေါ်မှာ Accident ဖြစ်လာတာတဲ့!!!

၃ ရက်လောက်အဆက်အသွယ်မရတော့ ဒီလိုပဲလိုင်းမရလို့မဆက်သွယ်နိုင်တာနေမှာလို့ ဖြည့်တွေးပေးနေခဲ့တာ။ မိန်းမနဲ့သားကို အရမ်းခင်တွယ်တဲ့သူမို့ အကြောင်းအရင်းမရှိဘဲ အဆက်အသွယ်မလုပ်ပဲ မနေဘူးဆိုတာသိလို့ အလိုလိုစိတ်တွေပူနေခဲ့တာ။ ၃ ရက်မြောက်အဆက်အသွယ်မရတဲ့နေ့မှာ အိမ်ကို တံခါးလာခေါက်တယ်။ တံခါးဖွင့်လိုက်တော့ ရုတ်တရက် သူ့ကိုမြင်လိုက်ရတဲ့အချိန် အရမ်းလွမ်းနေတာဆိုတော့ ပျော်ပြီးအံ့သြသွားတာ။ ပြီးမှ သူ့လက်က ဒဏ်ရာကိုမြင်တာ။ အလုပ်ထဲမှာ accident ဖြစ်ပြီး Medical Sign off နဲ့ပြန်လွှတ်လိုက်တာတဲ့ မိန်းမစိတ်ပူနေမှာစိုးလို့ မပြောတာတဲ့။ တကယ်ကြိုသာသိနေရင် တအားစိတ်ပူနေခဲ့မှာ။ လက်က မကျိုးသွားတာပဲကံကောင်းလှပါပြီ။ သူကတော့ ဒဏ်ရာသက်သာသွားရင် သင်္ဘောကို ပြန် join မယ်တဲ့။ အခုဒဏ်ရာရ‌တာတောင် ဟိုကပြန်မလွှတ်ပဲ သူ့ကိုအလုပ်ဆက်ခိုင်းနေတာ။ ဘယ်လိုမှမရတော့လို့ ဆေးခန်းပြပေးပါဆိုမှ ဂျပန်မှာကမ်းကပ်တဲ့အချိန် ဆေးရုံပို့ပေးတာတဲ့။ ဂျပန်ကဆရာဝန်က Unfit for Duty ဆိုမှ Medical Sign off နဲ့ပြန်ခွင့်ပေးတာ။ Medical sign off မို့ လစာဆက်လက်ခံစားခွင့်ရှိပြီး ဒဏ်ရာသက်သာတဲ့အချိန် အချိန်မရွေး ပြန် join လို့ရတယ်ဆိုပေမယ့် စိတ်မချနိုင်တော့ဘူး။ on board မှာ accident ကြောင့် dead body ပဲ ပြန်ရောက်လာတာတွေတောင်တွေ့တော့ ပိုကြောက်တယ်။ အခုက ဒီလောက်ပဲဖြစ်လို့လေ။ ဒီထက်ပိုဆိုးတာသာဖြစ်ရင်ဘယ်လိုလုပ်ပါ့မလဲ။ သင်္ဘောသားဆိုတာ နာမည်ပဲလှတာပါ။ ဝင်ငွေကောင်းတယ်ထင်ရပေမယ့် ပေးဆပ်ရတာတွေကလဲ အရမ်းကြီးတယ်။ ဘာမှမဖြစ်ကြတဲ့ သင်္ဘောသားတွေအတွက်တော့ကောင်းပါတယ်။ ပိုက်ဆံရှာဖို့ မိသားစုနဲ့ခွဲပြီး ပင်ပင်ပန်းပန်းလုပ်ရတဲ့အပြင် အသက်အန္တရာယ်အထိပါ အန္တရာယ်ရှိလာမယ်ဆိုရင်တော့ သင်္ဘောသားဆိုတဲ့ ဂုဏ်ကြီးကိုလဲ မမက်မောနိုင်တော့ပါဘူးးးးးးး

သားဖောင်းလေးမေမေ......

“ငါ့ကလေးက ဘာလို့ ဒီလောက်တောင် ဂျီကျနေရတာလဲ…” 😮‍💨

ဒီမေးခွန်းမမေးခင် အောက်ကအချက် ၃ ချက်ကို အရင်သိထားသင့်ပါတယ်ရှင် 💜👶

ကလေးက အမြဲတမ်း “မလုပ်ဘူး!”
“မရဘူး!”
“ဒါပဲလိုချင်တယ်!”
ဆိုပြီး ဇွတ်တောင်းနေတယ်…

အသေးအဖွဲလေးနဲ့ ငိုတယ်၊ ဒေါသထွက်တယ်၊ ပစ္စည်းတွေ ပစ်တယ်ဆိုရင်....

ဒါက “ကလေးက ဆိုးနေလို့လား?”
❌ မဟုတ်ပါဘူး

တစ်ခါတလေ ကလေးရဲ့ “ဂျီကျမှု” နောက်ကွယ်မှာ
မိဘတွေ မမြင်မိတဲ့ စိတ်ပိုင်းဆိုင်ရာလိုအပ်ချက်တွေ ရှိနေနိုင်ပါတယ်။ 🥺

ဒီနေ့ Baby Phaung က မိဘတိုင်း သိထားသင့်တဲ့ အချက် ၃ ချက်ကို ပြန်လည်မျှဝေပေးချင်ပါတယ်ရှင်👇

၁။ “ငါကိုယ်တိုင်လုပ်မယ်” ဆိုတဲ့ စိတ်က ကြီးထွားလာနေတာပါ 💜

ကလေးကြီးလာတာနဲ့အမျှ—

“မေမေ လုပ်ပေး” ကနေ
“ကိုယ့်ဘာသာလုပ်မယ်!”

ဆိုတဲ့အဆင့်ကို တဖြည်းဖြည်း ရောက်လာကြပါတယ်။
ဒါက မိဘကို ဆန့်ကျင်ချင်လို့ မဟုတ်ပါဘူး။

ကလေးက....
“ငါလည်း ကိုယ်ပိုင်ဆုံးဖြတ်ချက်တွေ ရှိတယ်”
ဆိုတာကို စတင်ခံစားလာတာပါ။

ဒါကြောင့် အဝတ်ကို ကိုယ်တိုင်ရွေးချင်တာ၊
ကိုယ်တိုင်စားချင်တာ၊
မိဘပြောသမျှကို “မလုပ်ဘူး” လို့ ပြန်ပြောတာတွေဟာ
ဖွံ့ဖြိုးမှုရဲ့ တစ်စိတ်တစ်ပိုင်း ဖြစ်နိုင်ပါတယ်။

ကလေးမှာ ကိုယ်ပိုင်ဆုံးဖြတ်ချက်ရှိလာပြီဆိုပေမယ့် စိတ်ခံစားချက်ကို ထိန်းချုပ်နိုင်စွမ်းကတော့ အပြည့်အဝ မဖွံ့ဖြိုးသေးပါဘူး။

အဲဒီတော့....

(“လွတ်လပ်ချင်စိတ်” + “မိဘကို မှီခိုနေရဆဲ” + “စိတ်ခံစားချက်မထိန်းနိုင်သေးခြင်း”) ဒီ သုံးခုကို ပေါင်းလိုက်တဲ့အခါ မိဘတွေမြင်ရတာက “ဂျီကျတယ်” ဆိုတာ ဖြစ်လာတတ်ပါတယ်။ 🥹

---

၂။ တစ်ခါတလေ ကလေးကို မဟုတ်ဘဲ… မိဘကိုယ်တိုင်ကို ပြန်ကြည့်ဖို့လိုပါတယ် 🪞

ကလေးက နည်းနည်းလေးမှားတာနဲ့
ကိုယ်က အရမ်းဒေါသထွက်သွားတတ်လား?

ကလေးက ငိုတာကို မခံနိုင်ဘူးလား?

“ငါ့ကလေးက ဒီလိုမဖြစ်ရဘူး” ဆိုပြီး
ကိုယ့်ကိုယ်ကိုယ် ဖိအားပေးနေမိလား?

တစ်ခါတလေ ကလေးရဲ့ အပြုအမူကို တုံ့ပြန်တဲ့အခါ
လက်ရှိအခြေအနေတစ်ခုတည်းကို မဟုတ်ဘဲ ကိုယ်ငယ်ငယ်တုန်းက ခံစားခဲ့ရတဲ့ နာကျင်မှုတွေ၊ အမြဲတမ်း အပြစ်တင်ခံခဲ့ရတာတွေ၊ “မငိုရဘူး” “မဆိုးရဘူး” “လူကြီးစကားနားထောင်” ဆိုပြီး ခံစားချက်တွေကို ဖိနှိပ်ခဲ့ရတာတွေက....

ကိုယ်တောင်မသိလိုက်ဘဲ ကိုယ့်ရဲ့ parenting ပုံစံထဲ ပြန်ဝင်လာနိုင်ပါတယ်။ ဒါကြောင့် ကလေးကြောင့် စိတ်တိုလာတဲ့အချိန်....

“အခု ငါက ကလေးရဲ့အပြုအမူကို တုံ့ပြန်နေတာလား… ဒါမှမဟုတ် ငါ့ရဲ့ကိုယ်ပိုင်စိတ်ဖိစီးမှုတွေပါ ရောနေပြီလား?” လို့ ခဏလေး ပြန်မေးကြည့်ပါ။ 💜

ဒါက ကိုယ့်ကိုယ်ကို အပြစ်တင်ဖို့ မဟုတ်ပါဘူး။

ကိုယ့်ကိုယ်ကို နားလည်ဖို့ပါ။
ကိုယ့်ကိုကိုယ်နားလည်မှ ကလေးကို နားလည်ပေးနိုင်လာမှာပါ။

---

၃။ ကလေးရဲ့ စိတ်အခြေအနေကို “အိမ်ကပတ်ဝန်းကျင်” ကလည်း သက်ရောက်စေပါတယ် 🏠

ကလေးတစ်ယောက်ဟာ အိမ်ထဲမှာ ဘာတွေဖြစ်နေတယ်ဆိုတာကို လူကြီးတွေထင်ထားတာထက် ပိုပြီး ခံစားတတ်ပါတယ်။

အိမ်မှာ မကြာခဏ ရန်ဖြစ်တာ၊
တင်းမာတဲ့လေထုရှိတာ၊
မိဘကိုယ်တိုင် စိတ်ဖိစီးနေတာ၊
ကလေးအပေါ် မျှော်လင့်ချက်တွေ အရမ်းများနေတာ…

ဒီလိုအရာတွေက ကလေးရဲ့
လုံခြုံမှု၊ စိတ်တည်ငြိမ်မှုနဲ့ အပြုအမူ တွေအပေါ် သက်ရောက်နိုင်ပါတယ်။

တစ်ခါတလေ ကလေးက

“မေမေ သား/သမီးကို နားလည်ပေးပါ”

“သား/သမီး စိတ်ရှုပ်နေတယ်”

“သား/သမီး မထိန်းချုပ်နိုင်သေးဘူး” လို့ စကားနဲ့ မပြောတတ်သေးတဲ့အတွက် ငိုခြင်း၊ ဂျီကျခြင်း၊ ဒေါသထွက်ခြင်း၊ ဆန့်ကျင်ခြင်း တွေနဲ့ ဖော်ပြတတ်ပါတယ်။ 🥺

ဒါကြောင့် ကလေးရဲ့ အပြုအမူကို မြင်တဲ့အခါ....

❌ “ဘာလို့ ဒီလောက်ဆိုးနေရတာလဲ?”
❌ “ဒီလောက်လေးတောင် မနားလည်ဘူးလား?”
❌ “အမြဲတမ်း ဂျီပဲဂျီနေတယ်!”

လို့ မြင်မယ့်အစား

🤍 “ငါ့ကလေး အခု ဘာလိုအပ်နေတာလဲ?”
🤍 “သူ့အတွက် ဒီအခြေအနေက ခက်ခဲနေတာလား?”
🤍 “ငါက သူ့ကို ဘယ်လိုကူညီပေးနိုင်မလဲ?”

လို့ ပြောင်းစဉ်းစားကြည့်ရအောင်နော်💜

---

🔻 မိဘတွေအနေနဲ့ ဘာလုပ်ပေးနိုင်မလဲ?

① ကိုယ့်စိတ်ကို အရင်သတိထားပါ။
ကလေးကို ပြင်ဆင်ဖို့မကြိုးစားခင် ကိုယ့်စိတ်ကို အရင်ငြိမ်အောင်လုပ်ပါ။

② ကလေးရဲ့ “မလုပ်ဘူး” ဆိုတာတိုင်းကို ဆန့်ကျင်မှုလို့ မမြင်ပါနဲ့။
တစ်ခါတလေ အဲဒါဟာ “ငါကိုယ်တိုင် လုပ်ချင်တယ်” ဆိုတဲ့ လွတ်လပ်လိုစိတ် ဖြစ်နိုင်ပါတယ်။

③ ခံစားချက်ကို လက်ခံပေးပြီး စည်းကမ်းကိုတော့ တိတိကျကျထားပါ။
“မင်းစိတ်ဆိုးနေတာ မေမေသိတယ်။ ဒါပေမယ့် လူကိုတော့ မရိုက်ရဘူး” ဆိုတဲ့ပုံစံမျိုးပါ။

④ Perfect Parent ဖြစ်ဖို့ မကြိုးစားပါနဲ့။
ကလေးအတွက် အရေးကြီးတာက ဘယ်တော့မှ မမှားတဲ့ မိဘမဟုတ်ပါဘူး။ မှားတဲ့အခါ ပြန်တောင်းပန်နိုင်တဲ့၊ ပြန်ချိတ်ဆက်နိုင်တဲ့ မိဘ ဖြစ်ဖို့ပါ🖤

---

💜 နောက်ဆုံးမှာ မေမေတို့ကို ပြောချင်တာတစ်ခုရှိပါတယ်…

ကလေးက ဂျီကျနေတဲ့အချိန်မှာ
“ဒီကလေးကို ဘယ်လိုပြင်ရမလဲ?” ဆိုတာထက်
“ဒီကလေး ဘာကိုပြောချင်နေတာလဲ?” ဆိုတာကို အရင်စဉ်းစားကြည့်ပါ။

ကလေးရဲ့ အပြုအမူတိုင်းဟာ ခွင့်ပြုရမယ်လို့ မဆိုလိုပါဘူး။ ဒါပေမယ့် အပြုအမူကို စည်းကမ်းနဲ့ လမ်းညွှန်ပေးရင်း၊ အဲဒီအပြုအမူရဲ့နောက်ကွယ်က ခံစားချက်ကိုလည်း နားလည်ပေးနိုင်အောင်ကြိုးစားရမှာပါ။

ကလေးကို ပြုစုပျိုးထောင်ရင်း ကလေးတစ်ယောက်တည်း ကြီးပြင်းလာတာမဟုတ်ပါဘူး။

မိဘတွေလည်း တစ်နေ့ထက်တစ်နေ့
ပိုပြီးနားလည်တတ်လာ၊ ပိုပြီးသည်းခံတတ်လာ၊
ပိုကောင်းတဲ့ မိဘတစ်ယောက်ဖြစ်လာအောင်
အတူတူ ကြီးပြင်းလာကြတာပါရှင်💜

ဒီစာလေးက “ငါ့ကလေး ဘာလို့ဒီလောက်ဂျီကျနေတာလဲ” လို့ စိတ်ပျက်နေတဲ့ မေမေတစ်ယောက်အတွက် အသုံးဝင်တယ်ဆိုရင် တခြားမေမေတွေမြင်အောင်လဲ Share ပေးသွားကြပါဦးရှင်💜

ကလေးကို နားလည်ပြီးမှ ပြုစုပျိုးထောင်ကြရအောင်💜
သားဖောင်းလေးမေမေ💜

#မိဘများအတွက် #ကလေးပြုစုပျိုးထောင်ခြင်း #ကလေးစိတ်ပညာ #မိဘနဲ့သားသမီး