Oromiyan Biyya.

dhiira keenya kolaaste
Kan dhiiga keenya lolaaste
Kan rarraastee nu garafte
Kan haqa keenya sharafte
Sin eebbisu sin abaara
Daalachaahi akka daaraa
~
Saba nagaa goolessitee
Kan taliila booressite
Nu tuffachuurra darbitee
Mirga keenya kan sarbite
Baqii cophi akka cabbii
Sittaa jigu tulluuf tabbi
~
Gochaan jirre lafaa fuutee
Qeerroof qarree morma huutee
Kan gogaa irraa quncaaste
Kan qeensa irraa buqqaaste
Affeelami akka shuummoo
Aadaa hafi akka huummoo
~
Mana hiyyeessa meeqaa gubdee
Bara dheeraa kan nu hubde
Lafaa jalatti nu hiitee
Afaan qawween kan nu miite
Sihaa nyaatu dhibeen golfaa
Ta'ii hafi nama kolfaa
~
Saba bal'aa yartuu gootee
Akka waatii kan nu hoote
Diineffattee qeerroof qarree
Kan dhidhiitte akka harree
Galaanni sihaa liqimsu
Dacheetti sihaa dhidhimsu
~
Fira jettee nutti lixxee
Dhalataa keenya kan fixxe
Shira xaxxee nutti dirtee
Kutaaf lagaan kan nu hirte
Mataan lixi bishaan boollaa
Boo'ichakee sirbaa oolla