El-Dactora

كل سنة و كل ام دايما طيبة♥️

كل عام و انتم بخير
عيد مبارك 🎊🎊

كل عام و انتم بخير 🐏🐏🐏

أدعية يوم عرفة 🤍.
‏قال النبي ﷺ "خير الدعاء دعاء يوم عرفه"

**بشرة جافة💧**

ببساطة الجفاف بيحصل لما الجلد يفقد الميه والزيوت الطبيعية اللي بتحافظ على رطوبته

و الأسباب كتير ممكن تكون

الجو بارد
استخدام صابون أو غسول قوي على البشرة
قِلّة شرب الميه
أو حتى بسبب مشاكل جلدية زي الإكزيما أو الصدفية

طيب و الحل ايه ؟

١. اختيار غسول خفيف
بلاش عن الغسولات اللي فيها رغوة كتير أو ريحة نفاذة
زي الغسولات اللي مكتوب عليها "for dry or sensitive skin".

٢. المرطب مهم جدا جدا
ترطيب الوش مرتين تلاته في اليوم
و يكون فيه مكونات زي:

Hyaluronic acid
Ceramides
أو حتى الفازلين أو الجلسرين جميل كمان

ولو البشرة ناشفة جدًا… الانتظار ٣ دقايق بعد الوش ما ينشف
وبعدها نضع المرطب وهي لسه مرطّبة شوية عشان يحبس الرطوبة جوه الجلد
٣. الدُش بماء دافي مش سخن
المية السخنة أوي هتخلي الجلد أنشف
يكون ماء فاتر، مش يغلي
تقليل المدة الى ١٠ دقايق كفاية.

٤. شرب ميّه…من اهم الحاجات خصوصا ف الصيف
البشرة من جوه محتاجة ترطيب زيها زي برّه.

٥. لا للكحول والعطور
الكريمات اللي فيها عطر أو كحول ممكن تزود الجفاف أو تسبب تهيج

* شعرك بيقع 👀*

تعالي نتعرف على أسباب تساقط الشعر الأكثر شهرة

🔹 نقص الفيتامينات والمعادن مثل الحديد (و الانيميا) ، الزنك، وفيتامين D
🔹 الضغوط النفسية والتوتر
🔹 تغييرات هرمونية مثل بعد الولادة أو أثناء انقطاع الدورة
🔹 أمراض مزمنة زي الغدة الدرقية
🔹 سوء التغذية أو اتباع رجيم قاسي
🔹 استخدام مستحضرات مضرة أو أدوات تصفيف زيادة عن اللزوم
🔹 و ممكن كمان يكون عوامل وراثية

🩸 الأنيميا (فقر الدم) من أكثر المشاكل الصحية المنتشرة وبتحصل لما يقل عدد كريات الدم الحمراء أو نسبة الهيموغلوبين في الجسم وده بيأثر على نقل الأكسجين لأعضاء الجسم.

🚩 من أهم الأعراض:

تعب وإرهاق مستمر
دوخة أو صداع
شحوب في الوجه
ضيق تنفس مع المجهود

🛡️ طرق الوقاية من الأنيميا:

اكل حاجات غنية بالحديد زي الكبدة و السبانخ و العسل الأسود و العدس
فيتامين C لأنه بيساعد على امتصاص الحديد (زي البرتقال والليمون)
بلاش نشرب الشاي أو القهوة بعد الأكل على طول لأنه بيقلل امتصاص الحديد
و لا زم نعمل فحص دوري لمستوى الهيموغلوبين خصوصا للحوامل و السيدات عموما

**الالوان اللي ممكن نلبسها ف الصيف**
اختيار لون الملابس تحت الشمس بيأثر بشكل كبير على كمية الحرارة والأشعة فوق البنفسجية (UV) اللي بتمتصها أو تعكسها.

أفضل الألوان اللي ممكن تلبسها في الشمس:

الأبيض والألوان الفاتحة (زي البيج، اللبني، الأصفر الفاتح):
بتعكس ضوء الشمس وبتقلل امتصاص الحرارة.
و بتخليك تحس برطوبة وراحة أكتر في الجو الحار.
لكنها ما بتحميش كويس من الأشعة فوق البنفسجية، إلا لو القماش سميك

الألوان الغامقة (زي الأسود والكحلي):
بتمتص الحرارة أكتر، فممكن تحس بسخونة
لكن العجيب إنها بتمتص كمان الأشعة فوق البنفسجية فبتدي حماية أعلى لو القماش مناسب.

ف الأفضل هو الجمع بين:

لون فاتح + قماش سميك أو مخصص للحماية من الشمس (UPF).
أو لبس ملابس بألوان متوسطة زي الرمادي أو الزيتوني، لو القماش خفيف ومش بيحبس الحرارة

بما ان امبارح الموضوع كان شائك و اتسألت فيه كتير ف دا شرح لفكرة تكون العرق و ريحة العرق ☺️

احنا عارفين إن العرق نفسه ملوش ريحة.. الريحة الوحشة بتيجي من حاجة تانية خالص و هيا البكتيريا

أولًا: فيه نوعين من الغدد العرقية في جسمنا:
(Eccrine glands):
دي موجودة تقريبًا في كل حتة في الجسم، وبتطلع عرق خفيف فيه مياه وأملاح، وده اللي بيحصل لما جسمك يسخن. العرق ده ملوش ريحة خالص.
(Apocrine glands):
دي بتبدأ تشتغل بعد البلوغ، وموجودة في مناطق زي تحت الإبط، حواليين الصدر، والمنطقة الحساسة. العرق اللي بيطلع منها تقيل شوية وفيه دهون وبروتينات.
طيب ليه الريحة بتطلع؟
اللي بيحصل إن فيه بكتيريا طبيعية عايشة على الجلد – زي Corynebacterium وStaphylococcus – بتاكل الدهون والبروتينات اللي في العرق اللي بتفرزه الغدة التانية، وتفرز مركبات بتعمل ريحة قوية

زي:
أحماض دهنية (زي 3-methyl-2-hexenoic acid)
مواد كبريتية (thioalcohols) ودي اللي بتدي الريحة النفاذة أو الكريهة
المركبات دي حتى بكميات صغيرة جدًا بتكون ريحتها قوية.

طب الريحة دي ممكن تزيد إمتى؟
الأكل: زي التوم، البصل، التوابل، واللحمة الحمرا الكتير
الهرمونات: خصوصًا بعد البلوغ أو مع زيادة الأندروجين
الوراثة: فيه ناس جيناتهم بتخلي العرق بتاعهم مفيهوش مواد بتعمل ريحة
قلة النظافة: بتخلي البكتيريا تتكون و بالتالي يطلع ريحة
الهدوم: القماش الصناعي بيحبس العرق أكتر من القطن و بردو البكتيريا تتكون عليه ف يطلع ريحة

ملخص سريع العرق اللي نسبة البروتينات و الدهون فيه اعلى من المياه بكتير و العرق اللي راكد ما اتحركش من مكانه فترة بيسهل تجمع البكتيريا و بالتالي تطلع ريحة 👌

كان معكم الداكتورة

**ريحة العرق صعبة**
دي فعلا حاجة ممكن تحرج أي حد، بس الحل بسيط!

النظافة الشخصية أهم حاجة، يعني دش يومي، وتجفيف الجسم كويس، واستخدام مزيل عرق مناسب للبشرة.

فيه كمان أكلات ممكن تزود الريحة، زي التوم، البصل، التوابل الحارة، واللحمة الحمرا بكميات كبيرة. حاول تقلل منها لو بتلاحظ الريحة بتزيد.

و مهم اوي ما ننساش نشرب مياه كتير، علشان الجسم يفضل نضيف من جوه.